ILOILO CITY – Ipaidalom sa autopsy examination ang maestro nga nasapwan patay sa Barangay Naslo, Maasin, Iloilo.
Ang biktima amo si Dante Roldan sang Serrano Street, Cabatuan, Iloilo kag assistant principal sang Cabatuan National Comprehensive High School.
Sa exclusive interview sa Bombo Radyo kay Police Chief Inspector Hilarion Roga sang PNP Regional Crime Laboratory, dal-on nila sa Kampo Delgado ang lawas sang biktima agud ipaidalom sa autopsy examination agud matul-id ang rason sang iya kamatayon.
Suno naman kay Police Inspector Menrico Candaliza, hepe sang Maasin Municipal Police Station, nakit-an ang biktima sa talamnan nga may pilas sa ulo tuga sang pagkalampos sang bato.
Suno kay Candaliza, posible nga tuman ka baskog ang paglampos sang bato sa ulo sang biktima bangud nabuka gid ini kag puno sang dugo sa diin nakit-an ang bato sa tupad man lang sang bangkay.
Ang biktima ang una nga nakit-an sang mga naga-jogging sa kilid sang dalan pasado alas-5:00 kaina sang kaagahon.
Ginapatihan nga gin-hold-up ang biktima bangud wala na ang wallet sini.