ILOILO CITY – Nagasinggitan sang hustisya ang kaupdanan sang ginpatay nga assistant principal nga nasapwan nga patay na sa Brgy. Naslo, Maasin, Iloilo.
Sa interview sang Bombo Radyo kay Principal Vicente Lauro sang Cabatuan National Comprehensive High School, indi sila makapati nga ginpatay gid si Assistant Principal Dante Roldan sa makangilidlis nga paagi.
Suno kay Lauro, mabuot nga tawo si Roldan kag maayo makigbagay sa mga tawo.
Bilang background suno sa principal, nagsulod sa serbisyo si Roldan sang 1977 bilang manunudlo sang Tiring National High School kag nasaylo sa Cabatuan National Comprehensive High School sang 1979.
Nangnin department head ini sang buluthu-an sang 1993 tubtob nga nangin assistant principal sang nagligad nga tuig sa diin siya man ang ginhimo nga manugdumala sang Junior High School.
Dugang pa sang principal, dako nga kadulaan sa ila si Roldan nga yara na sa ika-40 ka tuig sa serbisyo kag wala gid ini nakaagi nga naulamid sa kun ano man nga reklamo ukon kontrobersiya.
Nagalaum naman ang principal kag bug-os nga teaching staff sang Cabatuan National High School sa madasig nga paghatag sang hustisya sa biktima.