ILOILO CITY – Ginmando na sang pamunuan sang Police Regional Office 6 (PRO-6) ang pag-usisa sa pagkaulamid sang tatlo ka mga opisyal sang PNP sa rehiyon, matapos nga ginhingadlan sang self-confessed bagman nga nagabaton sang payola sa isa ka drug group.
Sa interview sang Bombo Radyo Iloilo, ginpahayag ni PRO-6 spokesman Supt. Gilbert Gorero nga ginmando na ni Police Regional Office 6 director C/Supt. Jose Gentiles nga magpakig-angot sa Negros Island Regional Police Office.
Ini matapos nga hingadlan ni Rickey Serenio, ginapahayag bagman sang Beria Drug Group nga nakabase sa Negros, sanday Supt. Orly Gabinete nga sa karon assigned sa PRO-6, nga nagabaton kuno sang bulanan nga payola gikan sa nasambit nga grupo.
Luyag hibaluon ni Gentiles ang status sang kaso ni Gabinete bangud sa Negros ang anay assignment sini.
Magluwas kay Gabinete, ginhingadlan man ni Serenio sanday S/Supt. William Senoron at S/Supt. Ronald Gepana nga mga anay opisyal sang Regional Intelligence Unit sang Rehiyon 6.