ILOILO CITY – Nag-angal ang isa ka nagabusong nga sex worker matapos gin-akusaran sang duha ka mga punong barangay nga nagkawat sang ila kuwarta sa sulod sang MM Lodge sa Sto. Niño Sur, Arevalo, Iloilo City.
Suno sa sex worker nga ginhinago lang kay Rose, duha ka bulan na nga nagabusong, nagkadto sa gina-ubrahan sini nga lodge ang duha ka mga punong barangay halin sa Mina, Iloilo agud magkuha sang serbisyo para sa hingalit nga kalipay.
Kada isa mga ini ang nagkuha sang sex worker kag nagkuha sang tig-isa ka kwarto.
Ginpahayag ni Rose nga nagtupa sa iya ang 57-anyos nga punong barangay apang nag-ugtas ini bangud wala nagwaan ang iya customer kag wala naman nagatindog ang kinatawo sini tubtub nga natulugan na lang ini.
Nag-guwa na lang ang sex worker kag sang pagbalik sini, nakibot na lang sang gintampa sang iya customer matapos ginpasibanggdan nga ginkawat ang ila kwarta.
Ginapahayag nga duha ka mga wallet ang yara sa posisyon sang 57-anyos nga punong barangay sa diin ang isa diri ang ginapanag-iyahan sang upod man sini nga opisyal kag gintago antes nagkuha sang isa man ka kwarto.
Sa P5,000 pesos nga unod sang wallet sang 57-anyos, P3,000 na lang ang nabilin.
Samtang sa P1,500 nga unod sang wallet sang abyan sini nga punong barangay, P300 pesos na lang ang nabilin.
Nagpamalibad naman ang mga punong barangay nga magreklamo bangud nahadlok ang mga ini nga mabal-an sang ila mga apo ang ila ginhimo.
Nahibaluan nga nag-seminar ang mga opisyal sa isa ka hotel sa Diversion Road, Mandurriao, Iloilo City kag nagdesisyon nga magkuha sang sex worker pagkatapos sang ila aktibidad.
Ang MM Lodge kun sa diin nag-check-in ang mga opisyal kag may stay-in nga mga sex worker ang ginapanag-iyahan ni Punong Barangay Diana Lynn Minerva sang Sto. Nino Surv Arevalo, Iloilo City.