ILOILO CITY – Naga-init na ang istorya sang pulitika sa probinsiya sang Iloilo, apisar malayo pa ang 2019 elections.
Ini matapos nga ginpatawag ni Iloilo Governor Arthur Defensor Sr. ang mga kongresista sa probinsiya sang Iloilo agud imbitaron sa lunch meeting, magluwas lang kay First District Rep. Richard Garin.
Nagtambong sanday Second District Rep. Arcadio Gorriceta, Ferjinil Biron sang Fourth District kag Fifth District Rep. Raul Tupas.
Kaupod man ang anak sang gobernador nga si Third District Rep. Arthur Defensor Jr. nga una na nagpahayag sang interes nga magkandidato nga gobernador sa masunod nga eleksyon.
Sa interview sang Bombo Radyo Iloilo, ginpahayag ni Garin nga iya man ginkatingala kun nga-a wala siya gin-imbitar kun ang ginhambalan amo ang kaayuhan sang probinsiya.
Una na ginpanginwala ni Gov. Defensor nga may lamud pulitika ang nasambit nga meeting.
Suno pa kay Garin, indi maayo nga istoryahan ang pulitika ilabi na nga bag-o lang natapos ang eleksyon.
Sa bahin ni Rep. Defensor, ginpahayag sini nga indi pulitika ang tinutuyo sang ginpatawag nga lunch meeting sang iya amay.
Makabig suno sa kongresista nga ordinaryo lang nila ini nga panyaga sang amay nga gobernador kaupod sang ila mga kakilala.