ILOILO CITY – Nadakpan na ang suspek sa brutal nga pagpatay sa assistant principal sang Cabatuan National Comprehensive High School nga si Mr. Dante Roldan, nga nasapwan nga wala na sang kabuhi sa Barangay Naslo, Maasin, Iloilo.
Sa interview sang Bombo Radyo Iloilo, ginpahayag ni Police Inspector Menrico Candaliza, hepe sang Maasin Municipal Police Station, ang nadakpan nga suspek amo si Rey Velasco, 20-anyos, nagatrabaho sa isa ka furniture shop.
Si Velasco ang ginatudlo sang 14-anyos sini nga upod, nga amo ang nag-drive sang motorsiklo nga ginsakyan nila sang biktima nagikan sa Cabatuan padulong sa Maasin.
Si Velasco man ang naglampos sang bato sa ulo sang assistant principal, suno sa testigo.
Ang menor-de-edad nga upod ni Velasco ang nagserbe testigo kag ginpahayag nga ginpahog siya sang suspek agud indi magpanugid.
Suno kay Insp. Candaliza, posible nga magkakilala ang biktima kag ang suspek.
Robbery ang nagaisahanon nga motibo nga nakita sang mga otoridad sa pagpatay sa assistant principal.
Si Mr. Roldan ang nasapwan nga patay sa talamnan sang tubo kag ginlampusan sang bato sa ulo.