ILOILO CITY – Padayon ang pagpangaluyag ni Magdalo Rep. Gary Alejano sa mga kaangay sini nga kongresista agud suportahan ang impeachment complaint nga ginpasaka batok kay Presidente Rodrigo Duterte.
Sa interview sang Bombo Radyo Iloilo, ginpahayag ni Alejano nga may pila na ka mga mamalidha ang nagkomitir sa iya nga suportahan ag impeachment.
Apang nagpamalibad ang kongresista nga magdetalye kun pila na ang ginauyatan sini nga numero.
Ginpahayag pa ni Alejano nga sa pihak sang super majority sa Kamara nga mga kaalyado sang Duterte administration, kampante ini nga makakuha sang nagakaigo nga suporta para sa ginpasaka nga impeachment case.
Samtang gina-finalize na ni Rep. Alejano ang supplemental complaint sa impeachment case nga ginpasaka batok kay Duterte.
Ginpahayag ni Alejano sa interview sang Bombo Radyo Iloilo nga kalakip sa igapasaka sini nga supplemental complaint ang isyu sa Benham Rise kag Scarborough Shoal.
Kasunod ini sang pagsulod sang mga barko sang China sa Benham Rise kag ginapahayag plano nga pagtukod sang Beijing sang monitoring station sa Panatag Shoal.
Suno kay Alejano, mabutang sa alang-alang ang kinamatarong sang Pilipinas sa Benham Rise kun pasugtan lang si Duterte sa pagpakig-abyan sini sa China.
Ginpahayag sang kongresista nga ang isyu sa mga gina-agawan nga teritoryo ang masami nga ginapamangkot sa iya sang mga kaangay nga mamalidha nga iya ginapalapitan agud hingyuon ang suporta para sa impeachment comlaint.