ILOILO CITY – Ginpasaka na ang kaso batok sa suspek sa brutal nga pagpatay sa assistant school principal sang Cabatuan National Comprehensive High School sa banwa sang Cabatuan, Iloilo.
Kaso nga robbery with homicide ang ginpasaka batok sa suspek nga si Rey Velasco, 20-anyos.
Si Velasco ang ginatudlo sang menor-de-edad nga testigo, nga nagpatay sa biktima nga si Dante Roldan, paagi sa paglampos sang bato sa ulo sang assistant school principal sa talamnan sang tubo sa Barangay Naslo, Maasin, Iloilo kun sa diin nasapwan ang bangkay sini.
Ginsaysay naman sang testigo kun paano nakaupod sang suspek ang biktima.
Ginpahayag sa Bombo Radyo ni PO3 Elmer Lentija sang Maasin Municipal Police Station, ala-1:00 sang kaagahon sang Miyerkules, nagainom ang biktima sa plaza sang Cabatuan samtang ang suspek kag ang witness ang naga-inom man sa ila lugar sa Tigbauan Road sa nasambit nga banwa.
Ginhagad sang suspek ang witness nga kadtuan ang biktima kun sa diin nag-istoryahanay ang duha.
Suno sa testigo, ginhagad sang suspek ang assistant principal kag nagsakay ang tatlo sa motorsiklo padulong sa Barangay Naslo sa banwa sang Maasin, Iloilo.
Apang ginbilin ang testigo sa dalan samtang ang suspek kag ang biktima ang nagdiretso sa talamnan sang tubo.
Apang nagbalik ag suspek nga indi upod ang assistant school principal kag gin-ako sang suspek nga ginkawatan sini ang biktima kag ginpatay.