ILOILO CITY – Duha ang patay sa magkatuhay nga insidente sang pagpangluthang sa probinsiya sang Iloilo.
Isa sa mga napatay ang barangay tanod sang Barangay Pulo Maestra Vita, Oton, Iloilo.
Sa interview sang Bombo Radyo Iloilo, ginpahayag sang testigo nga ginhinago lang ang pangalan, naga-inom sila sang biktima nga si Barangay Tanod Paquito Quintos, 53, sa peryahan sang matabo ang krimen.
Ginpalapitan sang suspek nga si Joebert Marmolejo ang barangay tanod kag apat ka beses nga ginluthang gamit ang .45 kalibre sang armas.
Gilayon naman nga nagpalagyo ang suspek samtang santo sa pagpangusisa sang mga otoridad, tsismis ang ginhalinan sang krimen kun sa diin nagapati ang suspek nga ginahimu-himuan ini sang istorya sang biktima, rason nga napikon.
Samtang, patay man ang isa ka lalaki matapos nga gintiro sa Guihaman, Leganes, Iloilo.
Ginkilala ang biktima nga si Rizalde Segura, 58, pumuluyo sang amo man nga lugar.
Ginpahayag sa Bombo Radyo ni PO2 Emmanuel Maude sang Leganes Police Station nga nagapungko sa tiyangge ang suspek nga si Denzel Caballero sang nag-agi ang biktima.
Nagbaisay ang duha kag naghangkatay nga magtiruhay.
Ginapahayag nga may daan na nga hiligut-anon ang duha nga nagsugod sa baboy nga ginpasagod sang suspek sa biktima apang sang magdako na, ginkuha lang sang suspek nga wala maglisensiya.