ILOILO CITY – Nag-enjoy kag madamo sang natun-an ang mga participants sang ginpatigayon nga songwriting workshop sang Bombo Radyo Philippines sa Conservatory of Music sang University of San Agustin sa siyudad sang Iloilo.
Nagikan pa sa nagkalain-lain nga sektor ang pumalasakop kaangay sang kabataan, madre, seaman, manunudlo kag mga nagpasakop man sa Ilonggo Music Festival 2016.
Ginpahayag ni Sister Josephine Capatan sang Dominican Sisters-Iloilo kag sang retirado nga manunudlo nga si Joerenda Camacho Lasmarias nga kalakip sa mga participants, dalayawon ang Bombo Radyo nga nakaisip sang proyekto.
Madamo sila sang natun-an sa paghimo sang kanta, pagbutang sang melody kag lyrics kag nadugangan ang ila nga nahibaluan.
Suhestyon pa sang anay manunudlo nga dapat mangin kabahin sang curriculum sa eskuwelahan ang songwriting agud ma-develop ang skills sang mga kabataan kag isa man ini ka paagi agud mapahilayo ang mga ini sa bisyo kaangay sang illegal drugs.
Ginpangunahan ini sang Ilonggo musicians kag anay kampeon sa Ilonggo Music Festival nga sanday Mr. Gerardo Muyuela, dean sang University of San Agustin Conservatory of Music kag Mr. Benny Castillon.
Ang Bombo Songwriting Workshop ang kabahin sang preparasyon sang Bombo Radyo para sa hiwaton nga Ilonggo Music Festival 2017 sa maabot nga Disyembre.