ILOILO CITY – Tuman ang paghinulsol nga nabatyagan sang isa ka bana matapos nga napatay ang kaugalingon nga asawa sa Barangay Agcuyawan Calsada, Barotac Nuevo, Iloilo.
Sa exclusive interview sang Bombo Radyo, ginpahayag sang suspek nga si Carlos Valdez, 40-anyos, sang Barangay Salinungan West, San Mateo, Isabela, nga indi sini hungod nga patyon ang asawa.
Nahinali-an lang ang suspek bangud sa tuman nga kaakig matapos siya ginbuyayaw kag ginsakit sang iya asawa.
Nahibaluan nga nag-inom-inom ang suspek upod ang mga kakilala kag pag-abot sini sa ila puluy-an, ginbuyayaw siya sang asawa kag ginsipa rason nga iya ini nabuno sang anom ka beses sa atubang pa sang ila anak.
Suno sa suspek, masami ini nga ginahimo sa iya sang asawa bangud sang kapigaduhon nila sa pangabuhi
Nagapati naman ang pamilya sang biktima nga indi intensyon sang suspek nga patyon ang asawa, apang desidido ang mga ini magpasaka sang kaso.