ILOILO CITY – Emosyunal ang bana nga nagpatay sa iya asawa sa Barangay Agcuyawan Calsada, Barotac Nuevo, Iloilo, matapos mapakig-angutan ang iya pamilya sa San Mateo, Isabela paagi sa Bombo Radyo.
Naghilibi-on ang mag-amay nga Carlos Valdez, 40, nga sa karon nagapangatubang sa kaso nga parricide, matapos nga ginbuno-patay ang iya misis nga si Ligaya Valdez, kag ang panganay sini sa una nga asawa nga si Irish Valdez, sang mag-istoryahanay ang mga ini.
Ginpanugyanan ni Irish ang amay nga magpakabakod kag ginpasiguro nga padulungan si Carlos diri sa Iloilo, sang ginakilala sini nga amay.
Naistorya man sang suspek ang ginakilala sini nga iloy nga si Mrs. Erlinda Valdez nga ginpadulungan sang Bombo Radyo Cauyan sa ila puluy-an.
Suno sa pamilya, una nga kahigayunan ini nga sila ang mag-istoryahanay matapos ang insidente, gani nagapasalamat ini sa Bombo Radyo.
Nahibaluan nga 10 na ka tuig nga wala makapuli sa Isabela ang suspek.
Una na ginpahayag ni Valdez nga wala ini sang intensyon nga patyon ang iya misis.
Suno sa suspek, nahinali-an lang siya bangud sang sobra nga kaakig sa masami nga pagpangakig kag pagpanakit sa iya sang misis.
Si Valdez ang ginpasakaan na sang kaso nga parricide.