ILOILO CITY – Nagapabilin nga aktibo sa operasyon sang iligal nga droga ang no. 1 drug lord sa Western Visayas nga si Richard Prevendido nga nagapanago sa mga otoridad.
Sa interview sang Bombo Radyo Iloilo, ginpahayag ni S/Supt. Christopher Tambungan, deputy regional director for operations sang Police Regional Office 6 (PRO-6), ang mga nagkaladakpan sa drug operation sa Iloilo ang kalabanan tawo ni Prevendido.
Nagakahulugan ini suno kay Tambungan nga may komunikasyon gihapon si Prevendido sa iya grupo.
Madali lang suno kay Tambungan ang pagbakal sang sim card para makapadayon sang komunikasyon si Prevenddo sa mga tinawo sini.
Ginpahayag ni S/Supt. Tambungan nga sigurado sila nga madakpan ang wanted drug lord apang nagpamalibad nga hatagan sang deadline ang ila kaugalingon kun san-o madakpan si Prevendido.
Si Prevendido ang may patong sa ulo nga P1 million nagikan sa city kag provincial government sang Iloilo.