ILOILO CITY – Ginpaagi sa social media sang duha ka mga opisyal sang banwa sang New Lucena, Iloilo ang paghabuyanay sang akusasyon.
Ini matapos nga i-post sa Facebook sang anay alkalde kag karon Board Member Lucille Mondejar Seville nga wala ginpadayon ni New Lucena Mayor Christian Sorongon ang P33 million nga balor sang proyekto nga naumpisahan sa administrasyon ni Seville.
Sa interview sang Bombo Radyo sa Board Member, ginpahayag sini nga napondohan na ang proyekto, na-bidding kag na-award sa nagdaog nga contractor apang wala ginpadayon ni Sorongon bangud magkaaway ang mga ini sa pulitika.
Gilayon naman ini ginsabat ni Sorongon paagi man sa Facebook kag ginpahayag nga madamo sang gin-umpisahan nga proyekto si Seville sang ini ang alkalde pa apang wala ginbayran ang kontraktor rason nga wala matapos.
Suno pa kay Sorongon, indi dapat pagbasulon ang iya administrasyon bangud si Seville ang rason kun nga-a wala matapos ang mga proyekto.
Ginpahanumdom pa ni Sorongon kay Seville ang P90 million grave misconduct nga kaso nga ginapangatubang sini sa Ombudsman.