ILOILO CITY – Nagalab-ot sa 20 ka mga opisyal sa Western Visayas ang yara sa listahan sang Philippine Drug Enforcement Agency (PDEA) nga may kaangtanan sa iligal nga droga.
Sa interview sang Bombo Radyo Iloilo, ginpahayag ni PDEA Assistant Regional Director Levi Ortiz nga pinakamataas sa nasambit nga mga opisyal ang alkalde panaog sa barangay tanod.
Apang gin-athag sang PDEA nga indi kalakip diri si Iloilo City Mayor Jed Patrick Mabilog nga ginaakusaran ni Presidente Duterte nga protektor sang iligal nga droga.
Suno kay Ortiz, 12 sa nasambit nga mga opisyal ang nagikan sa Iloilo kun sa diin lima sa mga ini ang punong barangay.
Apang nagpamalibad ang PDEA nga hingadlan ang nasambit nga mga opisyal kag ginpahayag nga padayon ang ila validation sa nasambit nga mga drug personalities.