ILOILO CITY – Nagpirma sa isa ka covenant for counterterrorism ang Armed Forces of the Philippines, PNP kag Muslim community sa Western Visayas sa tinutuyo nga magpadayon ang kalinong sa rehiyon.
Sa interview sang Bombo Radyo Iloilo, ginpahayag ni Police Regional Office 6 (PRO-6) spokesman Supt. Gilbert Gorero nga kabahin man ini sang kampanya sang Duterte administration batok sa terorismo.
Apang ginpanginwala sang mga otoridad sa Rehiyon 6 nga may pamahog sang terorismo sa Western Visayas rason nga ginpatigayon ang covenant signing.
Gin-athag man sang PNP nga indi lang ini para sa mga Muslim kundi bukas man para sa tanan nga sektor.
Gintambungan sang kapin 150 ka mga tawo ang covenant signing kun sa diin bug-os ang suporta nga ginpakita sang Muslim community sa Western Visayas.
Ginpahayag sa Bombo Radyo ni Hadji Muammar Faisal Arumpa, chairperson sang United Federation of Muslim Association in Western Visayas, nga sa karon wala pa sila sang namonitor nga pagpamahog sang radical Islamism sa rehiyon.
Apang nagtukod na sila sang screening committee para magmonitor sa mga utod nila sa relihiyon nga nagasulod sa Western Visayas, ilabi na ang nagikan sa Mindanao.
Nagpatigayon man sang boodle fight ang mga miyembro sang pulis, militar kag Muslims nga nagtambong sa covenant signing.