ILOILO CITY – Nagalab-ot sa 63 ka mga opisyal sang barangay sa probinsiya sang Iloilo ang yara sa drug watchlist sang Iloilo Provincial Police Office (IPPO).
Sa interview sang Bombo Radyo Iloilo, ginpahayag ni IPPO director S/Supt. Harold Tuzon nga ang nasambit nga mga barangay officials ang ginalakipan sang siyam ka mga barangay kapitan kag 54 ka mga barangay kagawad.
Suno kay Tuzon, boluntaryo nga nag-surrender sa mga otoridad ang nasambit nga mga barangay officials kag gin-ako nga nagagamit ang mga ini sang illegal drugs, apang ginpanginwala nga sila ang nagaduso sang droga.
Apang ginpahayag ni Tuzon nga wala siya nagapati sa claim sang nasambit nga mga barangay officials.
Ginpahayag sang IPPO director nga santo sa ila monitoring, pila sa nasambit nga mga opisyal ang nagaduso sang iligal nga droga.
Pero nagpamalibad ang PNP official nga magkomento kun makabulig ang kagustuhan ni Presidente Rodrigo Duterte nga ipaiway ang barangay election agud malimpyuhan ang mga barangay sa illegal drugs.