ILOILO CITY – Pulis ang nagapanag-iya sang drug kag prostitution den nga gin-raid sang mga otoridad kun sa diin nadakpan ang tatlo ka tawo kalakip na ang utod sang punong barangay sang North Baluarte, Molo, Iloilo City.
Sa interview sang Bombo Radyo Iloilo, gin-ako ni Alejandro Aurelio nga isa sa mga nadakpan sa drug raid, nga si PO3 Wilfredo Tagle nga anay assigned sa Arevalo PNP, ang nagapanag-iya sang drug den kag casahan.
Si Alejandro kag ang misis sini nga si Darryl Didulo ang nagaserbe nga caretaker sang lugar samtang ang pito nila ka tuig nga bata nga lalaki ang naga-serbe nga taga-dawo sang ginabaligya nga iligal nga droga sa ila mga customers.
Package ang operasyon sang mga ini kun sa diin kun magkuha sang babaye, mabakal man sang iligal nga droga.
Ginkaakig naman ni North Baluarte Punong Barangay Allan Aurelio, utod sang nadakpan nga drug pusher, sang mahibaluan nga pulis ang nagapanag-iya sang drug den.
Suno sa barangay kapitan, iya ipasirado ang lugar kag kinahanglan nga madula na ang prostitusyon.
Nahibaluan nga mismo ang barangay kapitan ang nagtimbre sa mga kapulisan nga magpatigayon sang raid agud dakpon ang iya utod, apang ginpahayag nga wala siya sang ideya kun sa diin nagahalin ang supply nga nagasulod sa drug den kag kun konektado ini sa mga drug groups.
Dugang pa sang punong barangay, sang magkuha sang permit, boarding house ang gin-rason sang mga ini.
Ginmando naman sang Iloilo City Police Office ang pag-imbestigar sa ginapahayag pulis nga tag-iya sang nasambit nga drug kag prostitution den.