ILOILO CITY – Naaresto sang Oton PNP ang siyam ka mga lalaki nga naaktuhan samtang nagapatigayon sang drag racing sa circumferential road sa Barangay Pakiad, Oton, Iloilo.
Sa interview sang Bombo Radyo kay SPO4 Danilo Loca, chief investigator sang Oton PNP, ginpahayag sini nga nakabaton sila sang impormasyon nga may nagpatigayon sang iligal nga karera sang motor sa lugar kag sang ila ginpadulungan, napuhag ang mga nagatipon-tipon nga mga grupo sang kalalakihan sa diin ang iban sa ila ang gilayon nagpalagyo.
Kalakip sa mga nadakpan amo sanday Engelbert Puyong, Renen Lizada, Michael Juarez, Melmark Patupatin, Nibo Abangan, Hyver Collado, Ariel Sambiano, Crispin Gico at Daryl Argente.
Gilayon naman nga ginkumpiska sang Oton PNP ang lisensya sang mga nagkaladakpan kag gin-turnover sa Land Transportation Office (LTO) Region 6.
Kadungan man ini suno kay SPO4 Loca nga nalunsyar na pormal ang Oplan Road Safety sa probinsya sang Iloilo paagi sa memorandum nga gin-isyu sang Iloilo Police Provincial Office.