ILOILO CITY – All systems go na ang probinsiya sang Antique sa pag-host sang Palarong Pambansa 2017.
Sa interview sang Bombo Radyo Iloilo, ginpahayag ni Atty. Arthur Lastimosa, legal counsel sang Antique provincial government kag chairman sang local organizing committee sang Palarong Pambansa, nga kompleto kag handa na ang mga billeting areas para sa mga delegates.
Apang ginkumpirma sini nga pila ka mga venue ang ginsaylo matapos nga ang iban sa venue nga una na ginpili, ang kulang sa pasilidad.
Ginpabugal naman ni Atty. Lastimosa nga handa kag mahimo na gamiton sa practice ang international standard nga track oval sa Binirayan Sports Complex nga main venue sang nasambit nga sporting event.
Magasugod naman sa pag-abot ang pila ka mga delegates subong nga semana.
Suno kay Lastimosa, sa maabot nga Biyernes ang arrival sang mga atleta sang Region 4-B kag Region 5 samtang ang iban pa nga mga delegado ang maga-abot pagkatapos sang Semana Santa.
Nahibaluan nga 12,000 ka mga delegates nagikan sa 18 ka mga rehiyon sa pungsod ang ginalauman sa 60th Palarong Pambansa nga patigayunon sa Abril 23-29 sa probinsiya sang Antique.