ILOILO CITY – Ginapaimbestigaran na sang Iloilo Provincial Police Office (IPPO) ang Balasan Municipal Police Station sa pagpamalibad nga magkustodiya sa drug suspect nga si Kenneth Tiope nga nadakpan sa drug operation sang Provincial Drug Enforcement Unit (PDEU) sa Camambugan, Balasan, Iloilo.
Sa interview sang Bombo Radyo Iloilo, ginpahayag ni IPPO director S/Supt. Harold Tuzon nga ipatawag si Balasan chief of police S/Insp. Gerry Leones.
Ginpahayag ni Tuzon nga iya man naistorya si S/Insp. Leones kag ginpahayag sang Balasan chief of police nga nakaresponde man ang mga ini sang ginhingyo ni Chief Insp. Charlie Sustento nga amo ang team leader sang PDEU nga nagpatigayon sang operasyon.
May nakalab-ot sa IPPO director nga may ginrespondehan nga stabbing incident ang Balasan PNP kadungan sang drug operation, apang kinahanglan pa ini i-validate suno kay Tuzon.
Gindepensaran naman ni Tuzon ang ulihi na nga koordinasyon sang grupo ni Sustento sa Balasan PNP.
Suno sa IPPO director, mahimo himuon ang koordinasyon antes, samtang nagapadayon ukon pagkatapos na sang operasyon.
Sensitibo suno kay Tuzon ang mga illegal drug operation kag gusto lang likawan ang mga leakage apang gin-athag nga wala man ini nagaduda sa Balasan PNP.
Apang gin-ako ni Tiope nga may abyan ini nga mga pulis sa Balasan.
Sa interview sang Bombo Radyo, ginpahayag ni Tiope nga pila ka mga pulis sang Balasan ang teammate niya sa basketball.
Suno pa kay Tiope, kasilingan sini kag upod pirme nga nagahampang sang basketball ang isa ka pulis nga nakilala niya lang nga si MM kag Magbanua ang apelyido.
Si Tiope ang anak sang anay dako nga drug personality nga si Rolly Tiope alyas Boy Amo nga miyembro sang Balasan Boys.
Madumdumam nga ang Balasan Boys ang gin-imbestigaran sadto sang Kongreso kasunod sang alegasyon nga ginaprotehiran ang mga ini sang duha ka mga prosecutors.