ILOILO CITY – Ginpanindugan ni Iloilo 5th District Representative Raul Tupas nga indi pamulitika, ang iya pagbulgar sa mga anomalya nga natabo sa scholarship program sang mga college students sa pagpamuno sang iya magulang nga si anay Iloilo 5th District Rep. Niel Tupas Jr.
Sa exclusive interview sang Bombo Radyo kay Tupas, gin-athag sini nga ang iya katuyuan amo nga mahatagan sang hustisya ang graduate sang Northern Iloilo Polytechnic State College (NIPSC) nga wala nabayran ang tuiton kag miscellaneous fees.
Suno kay Tupas, indi lahog-lahog ang P74 million nga wala mabayran nga tution sang mga college students rason nga indi ang mga ini makakuha sang ila Transcript of Records.
Nagdangat na suno sa mamalidha sa apat ka tuig ang tuition sang mga estudyante nga wala mabayaran sa idalom sang Iskolar sang Quinto program.
Mismo ang Deparment of Budget and Management (DBM) kag Commission on Audit (COA) ang makapamatuod sini suno kay Tupas.
Ginpahayag sang kongresista nga gin-istorya na sini ang presidente sang NIPSC nga si Dr. Ma. Theresa Palmares kag ila nga ipalab-ot sa opisina ni Presidente Rodrigo Duterte ang nasambit nga problema.