ILOILO CITY – Ginkilala sang Simbahan Katolika ang programa nga “Kahapon Lamang” sang Bombo Radyo Iloilo bangud sa special program nga “Light at the End of the Tunnel” nga ginapadala sang mga letter senders.
Ginpahayag ni Archdiocese of Jaro Commission on Family and Life director Fr. Randy Doromal nga ang mga kaangay nga programa ang nagahatag kasanag sa mga kabuhi nga nagakadulaan na sang paglaum kag naghatag sang leksyon nga tanan nga pag-antos ang may katapusan kag anuman nga pagpanghangkat ang mahimo malampuwasan.
Ginpasalamatan naman ni Bombo Warren French, area manager for Visayas, AM Division sang Bombo Radyo Philippines, ang pagkilala nga ginhatag sang Simbahan kadungan sang awarding ceremony sa mga nagdaog sa “Light at the End of the Tunnel.”
Ang kaangay nga pagkilala suno sa area manager ang nagahatag inspirasyon sa Bombo Raydo agud ipadayon ang mga programa kag proyekto para sa mga Pilipino sa pungsod kag sa bug-os nga kalibutan.
Kadungan sang pagtapos sang “Light at the End of the Tunnel” sang Kahapon Lamang program, ginkilala bilang grand prize winner si MJ sang Banate, Iloilo kag nagbaton sang P10,000.
Nagbaton naman sang P7,500 bilang 2nd prize winner, ang istorya sang battered wife nga si Virgo nga wala nadulaan sang pag-asa apisar nga palahubog kag gapanakit ang bana.
Third prize kag nagbaton sang P5,000 si Inday sang Cabatuan, Iloilo nga nagaisahanon nga ginpadako ang siyam ka mga kabataan matapos mapatay ang bana sa brain tumor.
Suno sa tatlo ka mga winners, nangin instant celebrity sila bangud bisan diin magkadto, gina-istoryahan sila bangud nga inspirasyon ang ila kabuhi.