Mga drug personality nga nadakpan sa Iloilo, mga pangayaw; MM, Cebu, Mindanao source sang droga – PDEA

ILOILO CITY – Indi makabig nga source sang iligal nga droga ang siyudad sang Iloilo.
Ini ang ginpahayag ni Philippine Drug Enforcement Agency (PDEA) Region 6 deputy regional director Levi Ortiz sa Bombo Radyo, base sa assessment sang ahensiya.
Suno kay Ortiz, ang mga supply sang illegal drugs nga nagasulod sa Iloilo ang nagahalin pa sa iban nga lugar.
Ang nagapanguna nga source sang supply nga ginadala sa Iloilo, amo ang Metro Manila, Cebu kag Mindanao nga ginapaagi sa Negros.
Ang iban nga supply suno kay Ortiz ang ginapalusot sa Capiz kag Caticlan.
Sa assessment sang PDEA, mga pangayaw ukon indi tumandok sang Iloilo ang kalabanan sang mga drug personalities nga nagakaladakpan sa siyudad sang Iloilo.