ILOILO CITY – Ginahandaan na sang partido ni Presidente Rodrigo Duterte ang mangin linyada para sa 2019 elections.
Ginsapol ni Iloilo City Rep. Jerry Trenas ang mga opisyal sang siyudad.
Ini agud hambalan ang pagsaylo sang mga lokal nga lideres sa PDP-Laban.
Sa exclusive interview sang Bombo Radyo kay Treñas, ginpahayag sini nga magluwas sa mga konsehal, napahibalo man niya kanday Mayor Jed Patrick Mabilog kag Vice Mayor Joe III Espinosa ang tuhoy sa pagsinapol.
Gin-athag sang mamalidha nga wala sang pilitay nga natabo kundi ginpatpat lang niya ang mga kaayuhan nga makuha sa pagtipyok sang partido.
Wala naman makatambong sa amo nga pagsinapol si Mayor Mabilog tungod “on official trip” ini subong sa Korea.
Talalupangdon naman nga tanan nga mga konsehal ang nagtambong magluwas lamang kanday Konsehal Joshua Alim kag Plaridel Nava nga ginapahayag maga-alyansa kay Mabilog sa 2019.
Ginkumpirma naman ni Iloilo City Councilor Jeffrey Ganzon nga gin-istorya ini mismo ni Presidente Rodrigo Duterte agud mangin miyembro sang PDP-Laban.