ILOILO CITY – Hugot ang ginapatigayon nga pagbantay sang mga pulis sa bug-os nga Western Visayas sa mga delegado sang Palarong Pambansa 2017.
Sa exclusive interview sang Bombo Radyo Iloilo kay Iloilo City Police Office (ICPO) director Police Senior Supt. Remus Zacharias Canieso, ginpahayag sini nga maga-agi sa siyudad sang Iloilo ang mga delegado nagikan sa nagkalain-lain nga mga rehiyon sa bilog nga pungsod kag ila ginpasigurado nga indi mabutang sa risgo ang seguridad sang mga ini.
Suno kay Canieso, indi lang ang mga pulis sa Antique Police Provincial Office (APPO) ang nakaalerto kundi ang tanan nga mga pulis nga na-assign sa nagkalain-lain nga mga entry point sa Western Visayas.
Magluwas diri, ginpasigurado man ni Canieso ang hugot nga monitoring sa mga delegado nga magatinir sa siyudad sang Iloilo.
Nahibaluan nga ang Palarong Pambansa ang maga-umpisa sa Abril 23 tubtub 29 sa diin tema subong nga tuig amo ang “2017 Palarong Pambansa: Converges Youth Power, Builds Sustainable Future.”