ILOILO CITY – Dagsa ang mga tumuluo kag turista nga nagapadulong sa isla sang Guimaras para sa Semana Santa.
Kaagahon pa lang, malaba na ang pila sa duha ka mga pantalan nga padulong sa banwa sang Buenavista kag Jordan
Magluwas sa Jordan, nagbutang man sang espesyal nga biyahe sang motorbanca nga nagadiretso mismo sa Balaan Bukid nga ginadugukan sang mga tumuluo nagikan pa sa nagkalain-lain nga probinsiya sa rehiyon.
Ini bangud sa ginapatigayon nga “Pagtaltal” ukon ang paglansang kay Hesus sa krus.
Sa paglibot sang Bombo News Team, balewala sa mga tawo ang tuman ka init nga panahon kag kadam-an sang mga ini, pagkatapos sang pamalandong sa Balaan Bukid, magalibot na ang mga ini sa mga tourist sites sa Guimaras.
May yara sang bug-os nga pamilya apang kadam-an grupo sang mga pamatan-on nga ginhangalitan ang long weekend agud magbakasyon kag makapamalandong.
Sa pihak sini, nagapabilin nga normal ang biyahe sang mga sakayan dagat padulong sa Guimaras.
Ginhugtan naman sang Philippine Coast Guard kag sang kapulisan ang seguridad ilabi na sa Ortiz wharf.
Sa interview sang Bombo Radyo Iloilo, ginpahayag ni Coast Guard Iloilo station head Lt. Commander Ramil Palabrica nga nag-deploy sila sang mga K-9 units sa mga pantalan kag floating assets sa kadagatan sa tunga sang Iloilo kag Guimaras.
Ginpasiguro man sang Coast Guard nga wala sang overloading sa mga sakayan dagat nga nagapadulong sa Guimaras.