ILOILO CITY – Padayon ang training sang mga atleta sang Western Visayas nga magapasakop sa Palarong Pambansa 2017.
Sa interview sang Bombo Radyo, ginpahayag ni Reymund Steil de los Reyes, coach sang athletics secondary level, sa pihak sang tuman ka init nga panahon kag Semana Santa, padayon ang ila practice sa Iloilo Sports Complex.
Kalakip sa ginatutukan sang mga atleta sang Rehiyon 6 ang mind conditioning.
Suno kay De los Reyes, ang ila tinutuyo sa training, amo ang magkampeon.
Luyag depensahan sang Western Visayas ang record sa athletics kun sa diin ang mga ini masami nagapanguna.
Apisar makabig nga higante ang National Capital Region nga masami kampeon, indi luyag mahuy-an sang Western Visayas bilang host sang pinakadako nga sporting event.
Ang 60th Palarong Pambansa ang hiwaton sa Antique sa maabot nga Abril 23-29.