ILOILO CITY – Ginmanduan na sang Iloilo Police Provincial Office (IPPO) ang tanan nga mga barangay officials kag mga barangay tanod nga
nahamtang sa mga coastal areas sa bilog nga Western Visayas nga mangin alerto sa posible pagsulod sang bandido nga Abu Sayyaf sa Iloilo.
Ini kasunod sang natabo nga engkuwentro sa tunga sang tropa sang gobyerno kag sang bandido nga grupo sa Bohol sa diin duha ka mga Ilonggo nga suldado ang napatay.
Sa interview sang Bombo Radyo kay IPPO director Police Senior Supt. Harold Tuzon, ginpahayag sini nga naka-full alert status na sila antes pa man magluntad ang Bohol clash.
Suno kay Tuzon, ginpanugyan sini sa mga opisyal nga magpalab-ot sa ila sang impormasyon kun may makita nga makaduluda nga mga tawo kag mga sakayan nga magadungka sa mga baybayon.
Magluwas diri, nagalibot man ang mga bantay dagat sang PNP kag seaborne patrol sa pagpanguna sang Philippine Navy kag Philippine Coast Guard (PCG) sa mga baybayon ilabi na sa norte nga bahin sang Iloilo.