50,000 nagdugok sa Balaan Bukid sa Guimaras sa Biyernes Santo

ILOILO CITY – Ginabanta naglab-ot sa 50,000 ka mga turista ang nagdagsa kag nagdugok sa Balaan Bukid sa Jordan, Guimaras kadungan sang Biyernes Santo.
Sa interview sang Bombo Radyo kay Lt. Commnader Ramil Palabrica sang Coast Guard Station Iloilo, base sa record sang manifesto, may 17,000 nga nag-agi sa pantalan kag nagdiretso sa tiilan sang Balaan Bukid.
May mga 11,000 naman nga nag-agi sa Jordan wharf.
May yara man nga nag-agi sa Buenavista wharf kag may yara man nga naghalin sa area sang Bacolod kag Negros Occidental nga nag-agi sa banwa sang San Lorenzo.
Apisar sang numero sang mga nagdagsa, nangin matalunsay naman ang pagpakadto-pakari sang mga pasahero tungod may nagakaigo nga preparasyon antes pa man ang event.
Ginapasalamatan naman ni Palabrica ang iban pa nga partner agencies nga nagpasiguro sang katalunsayan kag katawhayan sang bantog nga kahiwatan kada Semana Santa.