ILOILO CITY – Ginpatpat sang Ilonggo Tony kag Grammy-winning producer nga si Jhett Tolentino kun paano napilian ang TV host-actress nga si Kris Aquino sa isa ka Hollywood movie.
Sa exclusive interview sang Bombo Radyo Iloilo kay Tolentino nga isa ka Ilonggo, iya ginpahayag nga abyan sini ang direktor sa isa ka himuon nga pelikula base sa isa ka bantog nga nobela sa Amerika sa idalom sang Warner Brothers Pictures.
Suno kay Tolentino, nagakuha sang actor ukon actress kada pungsod sa Asya ang Warner Brothers kag sang naghingyo sa iya ang direktor sang nasambit nga pelikula nga magkuha sang talent sa Pilipinas, nadumduman sang producer ang Queen of All media.
Diri kag ginpatawgan ni Jhett si Kris sa bulig sang abyan sini nga si Laguna Rep. Marlyn “Len” Alonte-Naguiat kag Nene Chan nga utod sang Ilonggo songwiter-composer nga si Jose Mari Chan.
Ginpapasa sini ang actress sang isa ka audition video kag mapalaron nga ini ang napilian.
Ginpahayag ni Tolentino nga madamo sang mga Pinoy nga nag-audition apang nagapati ini nga si Kris lang ang fit para sa nasambit nga role.
Samtang, gin-athag naman ni Tolentino nga wala ini sang papel sa pelikula kundi naghatag lang ini sang suhestyon kag nagbulig sa iya mga abyan nga direktor sa Amerika.
Maga-umpisa naman ang taping sang pelikula sa madason nga bulan tubtub sa Hulyo kag ginalauman nga ini ang ipaguwa sa madason nga tuig.
Nahibaluan nga si Tolentino ang tumandok sang Zone 7, Calumpang Molo, Iloilo City kag pinakauna nga Pilipino nga nagbaton sang Grammy Award for Best Musical Theater Album sang nagligad nga tuig para sa broadway show nga “The Color Purple”.
Si Tolentino ang nagtapos sang iya elementarya sa Calumpang Elementary School, High School sa University of Iloilo kag sa nasambit man nga unibersidad sa Bachelor of Science in Accounting.