ILOILO CITY – Mabatyagan na ang Palarong Pambansa fever sa probinsiya sang Antique.
Kaangay nga piyesta ang mood sa bug-os nga probinsiya.
Pagsulod pa lamang sa probinsiya, ang dako nga sign board ang magasug-alaw sa mga motorista nga naga-abi-abi sa mga nagapadulong sa probinsiya kag sa mga delegado kag guests sang Palarong Pambansa 2017.
Ginpahamtangan man sang flaglets ang tagsa ka kilid sang mga dalanon samtang may mga banderitas man bilang tanda sa selebrasyon kag bugal sang Antique sa pag-host sang pinakadako nga sporting event sa pungsod.
Nagpaindis-indis naman ang mga delegasyon sa dekorasyon sang ila mga billeting areas.
Ang mga eskuwelahan nga ginatiniran sang tagsa ka delegasyon ang may dekorasyon nga nagapakita sang kultura sang mga rehiyon.
Sa paglibot sang Bombo Radyo news team, ginpahayag sang mga delegasyon nga kuntento ang mga ini sa pag-host sang Antique sang Palarong Pambansa.