ILOILO CITY – Nadakpan sang Criminal Investigation and Detection Group (CIDG)-Capiz ang isa ka Filipina nga wanted sa Financial Crimes Unit sa Toronto, Canada bangud sang nagasalalampaw nga kaso.
Ang suspetsado amo si Maria Wima Paulit Ladores, 39, kag nagatrabaho bilang isa ka empleyado sang isa ka kompaniya sa Toronto, Canada.
Sa interview sang Bombo Radyo kay Police Chief Inspector John Paul Tovera, pinuno sang CIDG- Capiz, ginpahayag sini nga modus ni Ladores ang paggamit sang nagkalain-lain nga pangalan agud nga indi madakpan.
Tatlo ka kaso ang ginapangatubang sang suspetsado bangud sa pagpanunto kag paggamit sang madamo nga pangalan.
Suno kay C/Insp. Tovera, sa ila pagpangusisa, natukiban nga may arrest warrant si Ladores bangud sang kaso nga fraud kag estafa sa Canada rason nga nagagamit sang lain-lain nga ngalan agud magpanago sa mga otoridad.
Nadakpan ang suspetsado matapos ang iya nga pagkuha sang driver’s license gamit ang pangalan nga Jazzie Denosta Albaladejo sa diin mismo ang matu-od nga Albaladejo ang nakadiskubre kag nagreklamo sa mga pulis.