ILOILO CITY – Magapatuman sang signal jamming ang oganizers, kadungan sang pagbukas sang Palarong Pambansa 2017 buwas sa hapon sa Binirayan Sports Complex sa San Jose de Buenavista sa Antique.
Ini ang ginkumpirmar ni Atty. Arthur Lastimoso, chairman sang local organizing committee sang 60th Palarong Pambansa sa interview sang Bombo Radyo Iloilo.
Ginpahayag ni Lastimoso nga direktiba ini sang Presidential Security Group (PSG), bilang kabahin sa pagpanghanda sa seguridad may kaangtanan sa pag-abot ni Presidente Rodrigo Duterte nga dinapit nga bisita sa opening ceremony.
Apektado ang area sang Binirayan Sports Complex kag mga kaiping nga lugar, apang ginpahayag ni Lastimoso nga indi man ini magdugay.
Lauman suno kay Atty. Lastimoso nga may signal jamming samtang yara sa Antique si Presidente Duterte.