ILOILO CITY – Duha ka mga basketball players halin sa Western Visayas sa Palarong Pambansa 2017 ang nasiplatan sang PBA legend nga si Atoy Co nga may potensyal.
Sa exclusive interview sang Bombo Radyo, ginpahayag ni Co nga head coach subong sang Mapua Cardinals sa National Collegiate Athletic Association (NCAA), ang nakitaan sini sang potensyal amo sanday Ryan Calama-an, 17, sang Leon Iloilo, nagataas sang 6’4″ kag estudyante sang Sta. Clarita International School; kag si Ron Rey Tolentino, 16, nagataas sang 6’2″ kag residente sang Caingin, La Paz.
Pahayag sang PBA legend, dako ang pagpasalamat sini kun maupod sa iya nga grupo ang duha ka players sang Western Visayas.
Nagpasalig man ini nga indi niya pagpabay-an kag indi lang siya magserbe bilang coach kundi mangin ika-duha man nga amay sa amo nga mga kabataan kun mag-upod ang mga ini.
Samtang, game man ang PBA legend sa paghambal sang standard extro sang Bombo Radyo nga “Basta Radyo, Bombo!”.