ILOILO CITY – Tuman ang kalipay nga nabatyagan sang Ilongga matapos makuha ang bulawan nga medalya sa High Jump elementary girls sa nagapadayon nga Palarong Pambansa 2017 sa Binirayan Sports Complex sa San Jose de Buenavista, Antique.
Nangin mahuluy-on pa si Mary Rose Billones sang Barangay Tupas, Carles, Iloilo sang gin-interview sang Bombo Radyo sa diin iya ginpahayag nga ini ang una nga kahigayunan nga nagpasakop ini sa Palaro.
Kaangay sang iban nga atleta, ginpakigbahin ni Billones nga ang sikreto sa iya kadalag-an amo ang pag-focus sa training.
Ang amay ni Billones ang isa ka tricycle driver samtang ang iloy naman sini ang nagabantay sa ila sari-sari store.
Sa exclusive interview sang Bombo Radyo kay coach Anecito Peranco Jr., uhot kag lambat lang ang ginagamit sang atleta sa pag-training sa diin ginahimo niya ini nga landing pads.
Nagbilib ini sa Ilongga high jumper bangud apisar nagahampang, nahimo sa gihapon sini nga balansehon ang oras sa pagtuon sa diin isa ini ka consistent honor student.