ILOILO CITY – Ginpasakaan na sang kaso nga mutilation ang misis nga nag-utod sang kinatawo sang iya bana gamit ang gunting sa Barangay Bancal, Carles, Iloilo.
Sa interview sang Bombo Radyo kay PO2 Alexis Bataga, imbestigador sang Carles PNP, ginpahayag sini nga ang korte na ang magadetermina kun makapiyansa pa ang suspek nga si alyas Liezel.
Samtang nagahinulsol na ang suspek sa nahimo sini nga krimen bangud sang sobra nga kaakig sa mister sa ginhimo nga pagpangbabaye sini kag pagsakit sa iya sadto.
Suno ka “Liezel”, kun hatagan sang kahigayunan, gusto sini magbalik sa bana nga si Mark apang iya man maintyindihan kun indi na siya sini pagbatunon kag dayunon ang kaso batok sa iya.
Ginahingyo lang sang asawa nga indi pagpabay-an sang iya bana ang ila tatlo ka mga kabataan kag ikonsiderar ang mga ini sa pagpasaka sang kaso batok sa iya.
Nakaistoryahanay na ang suspek kag ang mga ginikanan ni Mark kag apisar nga indi siya mabasol sang mga ini, wala man ang mga ini sang mahimo kag siya ang ginpanugyanan nga atubangon na lang ang konsekwensiya sang iya nahimo.
Nahibaluan nga wala na masugpon ang nautod nga kinatawo sang mister.