ILOILO CITY – Gin-athag sang anay tag-iya sang pick-up nga ginsakyan ni Supt. Ma. Cristina Nobleza kag ginamaneho sang Abu Sayyaf bomb expert nga si Reenor Lou Dungon alias Kudre sa Bohol nga indi na siya ang nagapanag-iya sang amo nga salakyan.
Sa exclusive interview sang Bombo Radyo kay Nemy Balacanta sang Guimbal, Iloilo, ginkakibot gid nila nga mag-asawa sang mabatian ang balita tuhoy sa pagkadakop kanday Nobleza sa diin ang ila anay salakyan nga Nissan Navarra nga may plate number FGN 270 ang ginhimo nga service sang mga ini sa Bohol.
Suno kay Balacanta, nakarehistro sa iya pangalan ang salakyan kag may sentimental value sa ila tungod ini ang pinakauna nila nga salakyan bilang mag-asawa.
Sang tuig 2012 suno kay Balacanta, naaksidente ang salakyan sa diin nahulog ini sa taytay sa banwa sang Oton, Iloilo.
Tungod sang pagkaguba, ginpadeklara nila ini nga total wreck sa insurance kag nagbakal sang bag-o nga salakyan.
Gindugang pa ni Balacanta nga wala sila makahibalo nga ginpakay-o sang insurance ang salakyan kag ginbaligya kay Supt. Nobleza.
Suno kay Balacanta, mas maayo nga maathag nga wala sila sang labot ukon ano man nga kaangtanan kay Nobleza ukon sa transaksiyon sa pagkabakal sang nahinambitan nga salakyan.
Matandaan nga si Nobleza ang nadakpan kaupod ang lover nga Abu Sayyaf member kag bomb expert nga si Reenor Lou Dungon alyas Kudre, iloy niya nga si Judith Dungon, kag isa pa ka menor-de-edad.
Si Nobleza ang ginakabig nga “balik-Islam” kag tiayon ni Sr. Supt. Allan Nobleza nga police attaché karon sa Pakistan.
