ILOILO CITY – Wala nangin upang ang kapigaduhon agud mapamatud-an sang Ilongga beauty queen nga si Ruffa Nava nga masarangan sini nga magpangibabaw sa patag sang pageantry kag modelling.
Sa exclusive interview sang Bombo Radyo kay Nava, 24, kag tumandok sang Barangay Duran, City Proper, ginpahayag sini nga iya inspirasyon ang kapigaduhon sa pagpasakop sini sa Bb. Pilipinas 2017.
Suno kay Nava, nagdako ini sa kilid sang baybay sa Fort San Pedro sa diin ang amay sini ang nagatrabaho bilang cook para sa mga preso sa National Bureau of Investigation (NBI) samtang ang iloy naman sini ang nagatrabaho sa opisina sang Department of Environment and Natural Resources (DENR).
Ginpahayag sang Ilongga beauty nga wala ini makatapos sang kolehiyo bangud sa kapigaduhon sa diin pagkatapos sang high school, nagtrabaho na ini bilang modelo agud may ibulig sa iya mga manghod nga naga-eskwela.
Advocacy naman ni Ruffa amo ang feeding program sa mga Ilonggo nga street children nga ginagutom.
Paathag sang beauty queen, naagyan sini nga wala nakakaon sang isa ka bes sa isa ka adlaw gani indi sini gusto maagyan sang mga kasimanwa ang magutuman.
Sa pihak sang mga naagyan sini nga pagtilaw sa iya kabuhi, nangin inspirasyon ini agud makuha ni Nava ang handom sini nga mangin isa ka beauty queen.
Nagpangayo naman sang suporta si Nava sa iya mga kasimanwa nga Ilonggo agud magdaog ini sa Best in National Costume matapos nakasulod sa Top 10.
Ang gown ni Nava ang himo sang Ilonggo nga si John Cliff Demaala nga amo man ang nagdisenyo sang long gown ni Miss Universe Tanzania Johan Dimack sa 65th Miss Universe pageant.
Ang coronation night sang Binibining Pilipinas 2017 ang patigayunon sa Araneta Coliseum sa Dominggo, Abril 30, 2017.