ILOILO CITY – Ginakabig nga dimalas ang salakyan nga gingamit sang deputy director sang Davao Regional Police Office Crime Laboratory nga si Supt. Maria Cristina Nobleza sa pagpalagyo sa checkpoint kaupod ang mga Abu Sayyaf sa Bohol.
Ini matapos nakaagi na aksidente ang salakyan sa diin halos indi ini mapuslan.
Sa exclusive interview sang Bombo Radyo kay Nemy Balacanta sang 91 Rizal Street, Guimbal, Iloilo, ginpahayag sini nga Disyembre 2012 sang nadagdag sa Batiano Bridge sa banwa sang Oton, Iloilo ang itom nga Nissan Navarra nga may plate number FGM 270.
Nagdumdom si Balacanta nga indi na mapuslan ang salakyan bangud ini ang nawasak gid matapos nagtupa sa bahin sang suba nga wala sang tubig.
Ila na ini nga gin-turnover sa insurance kag matapos ang aksidente, wala na sila makahibalo kun sin-o ang nagbakal sang salakyan.
Halos indi na ini makatulog matapos mabatian sa balita nga ginasakyan sang mga terorista nga Abu Sayyaf ang ila salakyan sa diin ang plate number sini ang wala gin-ilisan.
Suno kay Balacanta, ini ang una nga salakyan nga nakarehistro sa iya pangalan kag ginakabig sini nga dimalas bangud sa ikaduha nga kahigayunan na-involve na naman ini sa indi maayo nga hitabo matapos ginhimo nga getaway vehicle sang mga terorista.