ILOILO CITY – Patay ang table manager sang Small Town Lottery (STL) matapos ginpaarakan sang luthang sa Jaro Car Spa sa Barangay Lourdes, Jaro, Iloilo City.
Ang biktima nga si Bernardo Tampani, 54-anyos sang Barangay Gaub, Cabatuan, Iloilo ang miyembro sa karon sang Zerrudo group nga naga-operate sang STL sa siyudad sang Iloilo.
Ginpahayag sa Bombo Radyo Iloilo ni PO2 Saturnino dela Cruz, imbestigador sang Jaro Police Station, nagahulat ang biktima sang iya turno nga magpa-car wash sang ini ang ginluthang gamit ang machine pistol.
Nagalab-ot sa 18 ka mga basiyo sang bala ang narekober sa crime scene kun sa diin 10 ang ginapahaya nag-igo kay Tampani.
Suno naman sa isa sa mga nakasaksi sa krimen nga si Biboy, isa ka suspek nga sakay sang motorsiklo ang nagtiro sa biktima.
Wala makit-an ang nawong sang suspetsado bangud naka-helmet ini kag naka-shades sang itom.
Blangko naman ang himata ni Bernardo Tampani sa motibo sa pagpatay sa biktima.
Sa interview sang Bombo Radyo, ginpahayag ni Abby Cudo nga ginakabig na utod si Tampani bangud sa ila na ini nagpuyo sumugod sang 20-anyos pa lang, nga indi nila mapat-od kun nga-a ginpatay ang biktima.
Kun bangud sa gambling ukon sugal, mahimo suno kay Cudo, apang kun iligal nga droga ang motibo sang mga suspek, indi ini matuod.
Ginpahayag ni Cudo nga konektado sadto si Tampani sa grupo sang ginpatay nga drug lord nga si Melvin Odicta Sr. apang indi sa iligal nga droga kundi sa illegal gambling.
Kaupod suno sa iya si Tampani sa grupo ni Toto Supremo.
Nagapati si Cudo nga may kaakig ang suspek kay Tampani bangud sa kadamuon sang bala nga ginbubo sini sa biktima.