ILOILO CITY – Wala nagalaum ang pamilya sang Ilongga nga si Ruffa Nava sang Barangay Duran, City Proper nga makasulod ini sa Bb. Pilipinas 2017.
Sa exclusive interview sang Bombo Radyo Iloilo kay Mrs. Maila Nava, iloy ni Ruffa, ginpahayag sini nga mixed emotions sila samtang nagahilapit na ang coronation night sang Bb. Pilipinas 2017.
Suno kay Mrs. Nava, ginpanamkom niya sa anay American actress nga si Phoebe Cates ang iya anak kag ginpangalan naman ini kay Ruffa Guttierez nga ginkoronahan bilang Binibining Pilipinas World 1993.
Apang suno sa iloy sang Ilongga beauty, wala ini nagdumdom nga mangin isa ka beauty queen ang iya anak bangud maitom ini sadto, maniwang kag daw lalaki kun maghulag.
Sa lamharon nga edad, nagtrabaho na si Ruffa agud may balunon ini sa eskwelahan.
Nagbaligya ini sang ice candy, ice buko, chicharon kag mani sa Fort San Pedro.
Sa pihak sini, suno sa iloy, wala ginkahuya sang iya anak ang ila pigado nga pangabuhi kag nagtinguha ini agud may makaon sila sa pang-adlaw-adlaw.
Si Ruffa ang nagsulod sa modelling pagkatapos sang High School agud may ibayad sa eskwelahan ang iya mga manghod kag mga hinablos.
Ginpabugal man sang iloy ni Ruffa nga ang Ilongga beauty ang nagbakal sang sin sa ila balay agud indi na ini magtulo sa tion nga mag-ulan.
Madamo naman sang mga ginapasakupan nga beauty pageant si Ruffa kag ini na ang ika-duha nga national pageant nga iya ginapasakupan matapos wala magdaog sa Miss World Philippines 2014 sa diin nakuha ni Valerie Weigmann ang korona.
Nahibaluan nga si Ruffa ang miyembro sang Professional Models Association of the Philippines (PMAP) sa diin miyembro man sanday Miss International Kylie Verzosa, Bb. Pilipinas Intercontinental 2016 Jennifer Ruth Hammond kag Miss Philippines Universe 2016 Maxine Medina.
Ang coronation night sang Binibining Pilipinas ang patigayunon sa Dominggo, Abril 30, sa Araneta Coliseum.