ILOILO CITY – Nagtudluanay ang Philippine Drug Enforcement Agency (PDEA) kag Philippine National Police (PNP) kun sin-o ang may kakulangan sa ginapahayag palpak nga kampanya batok sa iligal nga droga sa Western Visayas.
Ini matapos ginpahayag ni PDEA Region 6 director Atty. Gil Pabilona nga “loosing” ukon napaslawan ang illega drugs campaign sang otoridad sa rehiyon bangud sa madata gihapon nga kalakalan sang iligal nga droga.
Ginkontra naman ini sang Police Regional Office 6 (PRO-6) kag ginpanindugan nga epektibo ang tikang sang PNP agud tapnaon ang iligal nga droga sa rehiyon.
Sa interview sang Bombo Radyo Iloilo kay PRO-6 Deputy Director for Operations Senior Supt. Christopher Tambungan, ginpahayag sini nga wala sang kamatuoran ang ginpahayag sang PDEA chief nga nagahina na ang kampanya sang kapulisan batok sa iligal nga droga.
Ginhalimbawa sang opisyal ang operasyon kahapon kun sa diin naaresto si Jenny Vie Goriona kag ang duha pa ka babaye nga ginakabig bigtime pusher nga nakuhaan sang halos P1 million nga balor sang iligal nga droga.
Wala man nag-untat suno kay Tambungan ang operasyon sang kapulisan batok sa illegal drugs paagi sa mga anti-drug enforcement unit sa mga police stations.