ILOILO CITY – Nagpasar sang resolution ang League of Municipalities of the Philippines (LMP) Iloilo Chapter ga nagahingyo sang mas madasig nga imbestigasyon sa mga alkalde sa probinsya sang iloilo nga una na gintumod ni Presidente Rodrigo Duterte nga mga protector sang iligal nga droga.
Sa interview sang Bombo Radyo Iloilo, ginpahayag ni LMP President kag Ajuy Mayor Jett Rojas, madugay na nga ginahingyo ni Maasin Mayor Mariano Malones ang madasig nga imbestigasyon sa ila nga ginpanglawag ni Pres. Duterte tungod samtang nagadugay, indi maathagan ang mga pumuluyo.
Suno kay Rojas, nagpasar sila sang resolution nga nagahingyo sang madasig nga imbestigasyon indi lamang para kay Malones kundi kalakip naman kanday Calinog Mayor Alex Centena kag Carles Mayor Siegfredo Betita.
Ang tatlo ka mga alkalde upod kay Iloilo City Mayor Jed Patrick Mabilog ang gintumod ni Duterte nga mga illegal drugs protector.