ILOILO CITY – Ginlunsyar sang Department of Health (DoH) diri sa siyudad sang Iloilo ang Philippine Plan of Action for Nutrition (PPAN).
Tinutuyo sang programa nga masabat ang mga problema sang malnutrisyon sa pungsod sa sulod sang anom ka tuig halin 2017 tubtob 2022.
Ginpangunahan mismo ni Health Secretary Paulyn Jean Rosell Ubial ang kahiwatan kaupod ang Governing Board sang National Nutrition Council.
Magluwas sa micronutrient defficencies sa pungsod, target man sang programa nga masolbar ang problema sang overweight ukon sobra sa kabug-aton kag obesity.
Suno sa DoH, nagapabilin nga mataas ang malnutrisyon sa pungsod sa diin ginabanta may 3.8 milyon ka mga bata ang masami ginagutom samtang may ginabanta 18 milyon naman nga mga pilipino ang overweight kag obese.
Santo sa pagtuon, nagalab-ot sa P328 billion ang nagakadula sa ekonomiya sang pungsod tungod sang malnutrisyon.
Agud masabat ang problema, mas pasangkaron sang DoH ang implementasyon sang mga programa para batu-an ang malnutrisyon, kag maengganyo ang mga local government units nga malab-ot ang mga malayo nga kabaranggayan kag mga ginakabig indigenous communities.
Ang PPAN amo ang kontribusyon sang pungsod para sa Sustainable Development Goals sang United Nations nga masabat ang gutom kag makaangkon sang food security sa pungsod.