ILOILO CITY – Ginakahuya sang tiglikom sang Department of Health (DOH) ang mataas nga porsiyento sang stunting ukon pagkunol sang pagdako sang mga kabataan sa bilog nga Pilipinas.
Suno kay Health Secretary Paulyn Jean B. Rosell-Ubial, 33 percent sang mga kabataan sa Pilipinas ang kulang sa height ukon kataason kag weight ukon kabug-aton.
Ginpahayag man sang tiglikom nga isa ang Pilipinas sa mga pungsod sa Southeast Asia nga may pinakamataas nga stunting rate ukon mga putot kun ipaanggid sa iban nga mga pungsod.
Isa sa mga nakita nga pamaagi sang DoH agud matapna ang ini nga problema amo ang pagpanagtag sang mga LED TV sa mga rural health unit kag mga ospital sa diin ipakita diri ang mga pamaagi agud matapna ang malnutrisyon nga isa sa mga rason sa pagputot sang mga tawo sa Pilipinas.