ILOILO CITY – Ginpanindugan ni Iloilo City Rep. Jerry Trenas nga matinlo ang iya konsiyensiya sa pihak sang pagboto sini batok sa appointment ni outgoing Department of Environment and Natural Resources (DENR) Secretary Gina Lopez.
Sa pihak ini sang ginpahayag ni Presidente Rodrigo Duterte nga nasuhulan ang pila ka miyembro sang Commission on Appointments (CA) rason nga wala makalusot ang appointment sang tiglikom.
Sa interview sang Bombo Radyo Iloilo, ginpahayag ni Trenas nga wala siya makabaton sang “lobby money”.
Wala man suno sa kongresista sang mining firm nga nagpalapit sa iya agud magtanyag sang suhol.
Ginpahayag sang mamalidha nga nagboto ini santu sa dikta sang iya konsiyensiya kag nagapati nga ini man ang ginhimo sang iya mga kaupdanan.
Dugang pa ni Trenas nga wala sang conflict of interest sa iya bahin bangud wala man sang mining sa Iloilo.
Sa pagkamatuod suno sa kongresista, iya pa ginkonsiderar ang pagka-Ilongga ni Lopez.
Gindayaw naman ni Trenas ang passion kag adbokasya ni Lopez para sa dunang manggad kag nagalaum nga ipadayon ini sang sin-o man nga magabulos sa posisyon ni Lopez sa DENR.