ILOILO CITY – Duha na ang patay sa outbreak sang typhoid fever sa Barangay Tubod, Passi City, Iloilo.
Sa interview sang Bombo Radyo Iloilo, ginpahayag ni Dr. Grace Trabado, provincial health officer, ang duha ang kabahin sang lima ka mga kumpirmado nga kaso sang typhoid fever sa nasambit nga barangay.
Magluwas diri suno kay Dr. Trabado, duha pa ka mga biktima ang padayon nga ginakumpirma sa karon kun positibo man sa typhoid fever.
Ginpahayag ni Trabado nga ang kontaminado nga bubon nga ginakuhaan sang mga pumuluyo sang tubig nga ilimnon ang rason sang outbreak.
Wala sang tabon ang nasambit nga bubon rason nga na-contaminate.
May kaangtanan sini, ginmando na sang Provincial Health Office nga untaton anay sang mga pumuluyo ang pagkuha sang tubig sa nasambit nga bubon.
Ginapaidalom naman sa water analysis ang sample sang tubig nagikan sa bubon.
Ginpanugyan sang Provincial Health Office sa mga pumuluyo ang gilayon nga pagpakonsulta kun may mabatyagan nga sintomas sang sakit, magmintinar sang proper hygiene kag magpanghugas sang kamot agud mapabilin ang kalimpyo.