ILOILO CITY – Dismayado ang isa ka high profile inmate sa Iloilo District Jail sa Barangay Nanga, Pototan, Iloilo, sa pagdalahig sa iya pangalan sa kontrobersiya sang ginapahayag padayon nga illegal drug transaction sa nasambit nga BJMP facility.
Sa interview sang Bombo Radyo, hugot ang pagpanginwala ni Reymund Alarba, anay miyembro sang Alarba Group, nga involved sa nagkalain-lain nga krimen sa Iloilo, nga sa iya nagakuha sang supply sang droga ang nadakpan nga anay Tokhang surrenderee nga si Josefina Doctora.
Suno kay Alarba, nabatian sini mismo sa Bombo Radyo sang gintumod ini ni Doctora nga source sang droga sa sulod sang presuhan.
Ginpanindugan ni Alarba nga indi siya ang ginbisita ni Doctora sang adlaw nga ini ang nadakpan kag nakuhaan sang shabu.
Sa baylo, ang iya upod nga preso nga si Marco dela Cruz ang gintudlo sini nga ginbisitaha ni Doctora.
Una na ginpahayag sa Bombo Radyo ni Doctora nga nagakuha ini sang suplay sang droga kay Alarba nga nagapangatubang sang kaso nga robbery, kag Marco dela Cruz sang Batad, Iloilo.
Suno kay Doctora, iya ginatago sa iya bra, kinatawo kag alatrasan ang ginakuha nga droga sa sulod sang presuhan.
Madasig lang suno sa drug pusher ang magpalasik sang illegal drugs gikan sa presuhan bangiud nga wala man suno sa iya nagapatigayon sang inspeksyon ang mga personnel sang Iloilo District Jail sa mga nagabisita sa presuhan.