HIV cases naglapta na sa halos kada banwa sa Iloilo, local transmission nagtaas – DoH

ILOILO CITY – Halos kada banwa sa probinsya sang Iloilo ang may yara na sang kaso sang Human Immunodefficiency Virus (HIV).
Ini kun basehan ang pinakaulihi nga data nga ginpagwa sang Department of Health (DOH) Region 6.
Sa interview sang Bombo Radyo, ginpahayag ni Dr. Elvie Villalobos sang DoH Region 6, naglab-ot na sa 41,315 ang kaso sang HIV sa bug-os nga pungsod humalin 1984 tubtob 2017 sa diin sa Western Visayas, may yara na sang 1,677 ka mga kaso.
Sa Iloilo City, may 439 na ka mga kaso sang HIV nga amo ang pinakataas sa Region 6, ginasundan sang probinsya sang Iloilo nga may 313, Negros Occidental nga may 295, Capiz nga may 115, Antique nga may 72 kag Guimaras nga may 33 ka mga kaso.
Paathag ni Villalobos, sang una madamo sang kaso nga gin-transmit sang mga dumuluong apang pagsulod sang tuig 2000 pasaka, kadamuan na sang mga kaso ang locally transmitted infections.